131Eta noan auk aa taan nini totoang dasi lias, dais deng atuli lia tamlom, dais deng Ama Lamtua ima-ii in ne sorga nguas, mo auk muik in neka-namnau bubuit lo kon nam, un ambak ki saa la? Auk in aa ka muik nahin lo, banansila el kong man lin dahu-dahut tuun na, tamlom tong blo ka lin na. 2Eta noan auk muik karunya le tek Ama Lamtua in hida ngas bel Un atulin nas, nol auk taan totoang dais in buni-napang ngas, nol auk nangan taan totoang dais man atuil in tana ngas, in tana ka, nol eta auk in parsai Ama Lamtua ka kuat-tes didiin auk pekot nal leten nas, mo auk muik in namnau bubuit lo kon nam, un ambak ki saa la? Auk in tao nas muik ambak mes lo kon.aMatius 17:20, 21:21, Markus 11:23 3Nol eta auk hee nuli auk hmuki-nalan nias, hidim pake un duit ta totoang, le nalo atuil kasiang ngas, tamlom sao auk apang ngi le daid in tunu-dadung,* mo auk muik in namnau bubuit lo kon nam, un ambak ki saa la? Auk naka bali apang ngi kon parsum tuun. Lole na muik ambak lo.

4Ta in namnau ka na mo, leko.

Namnau ka na mo, kehe.

Namnau ka na mo, idus-neo lo.

Namnau ka na mo, naka bali apan lo.

Namnau ka na mo, koaok lo.

5Namnau ka na mo, dasin daat lo.

Namnau ka na mo, dudui tuun lo.

Namnau ka na mo, komali dadahut lo.

Namnau ka na mo, pesang dael nol atuil lo.

6Namnau ka na mo, dalen kolo nol asa man in toma ngas,

nol kom dais in tom lo ngas lo.

7Namnau ka na mo, tahang nala.

Namnau ka na mo, parsai tutungus.

Namnau ka na mo, nahlae napiut.

Namnau ka na mo, tahang tutungus.

8Namnau ka na mo, tene tahan lo.

Mo asa man Ama Lamtua mee-baha las in nahdehe ngas, lako-lako lam parlus pait lo ka. Nol atuli li aa nini dasi bili-ngala kon, lako-lako lam pake dais nas lo ka. Ta asa man atuil in tana ngas, tanas, lako-lako lam muik ambak pait lo. 9Halas ni kit in tana ka suma bubuit sii. Eta kit daid Ama Lamtua mee-baha kam, kit in teka ngas dabun nabale. 10Mo lius un oras sa lam, mam totoang sa-saa li daid inu. Nol lius oras na lam, dasi-dais in dabun nabaleng ngas kon, pakes lo ka.

11Auk bel kleta elia: dedeng auk anang bii kua, auk in aa ka nol auk in nangan na, banansila el tana-ana blutu kas in aa nol in nangan na kon. Mo halas ni auk teneng son. Undeng na le auk nafoan banansila el tana-ana blutu ka pait lo.

12Auk bel kleta didang pait: halas ni kit ngat net bubuit son, mo langa isi lo bii, banansila el didaan silan se hdidan in daat son na. Mo nesang le lako lam totoang daid langa. Kit in ngat neta ka banansila el dadani ne kit sila-matan. Halas ni auk in nangan tana ki suma bubuit sii. Mo lako-lako lam auk nangan taan totoang, banansila el Ama Lamtua Allah in taan deng auk aap-inang ngi totoang nga.

13Tiata halas ni, kit musti daek dasi tilu man tahang napiut. Dais nas elia:

kit musti parsai napiut se Ama Lamtua;

kit musti nahlae napiut noan, mam Un ator totoang nas le daid banan;

nol kit musti namnau apa tutungus.

Deng dasi tiul nias, in muun dudui ka mo, in namnau . Ta in namnau ka, man banan dui deng totoang.

*13:3: Dais Yunanin tenga las man dul tapnaeng noan, “sao auk apang ngi le daid in tunu-dadung”.

a13:2: Matius 17:20, 21:21, Markus 11:23